Feedback

ქართველმა კალათბურთელებმა ევროპის ჩემპიონებთან წააგეს

  /   ნანახია 589 ჯერ

ქართველმა კალათბურთელებმა ევროპის ჩემპიონებთან წააგეს

საქართველოს ეროვნულმა ნაკრებმა ქალაქ რუანის გადავსებულ, 6000-იან „კინდარენაზე“ ევროპის მოქმედ ჩემპიონ საფრანგეთთან დიდი ანგარიშით წააგო. იგორ კოკოშკოვის გაწვრთნილმა გუნდმა ფრანგებთან ნორმალური პირველი ტაიმი ჩაატარა და დიდი შესვენებისთვის მხოლოდ 9 ქულას აგებდა, თუმცა მეორე ნახევარში ზომაზე მეტი შეცდომა დაუშვა და ზედიზედ წაგებილი მესამე (9:30) და მეოთხე (12:24) პერიოდების შემდეგ მატჩი 53:95 დათმო.

ფრანგებს ევროპის ჩემპიონი გუნდი ჰყავთ და ახლაც მხოლოდ პირველობას გეგმავენ. ძნელი სავარაუდოა, ამაში მათ რომელიმე ევროპულმა ნაკრებმა ხელი შეუშალოს, იმდენად ძლიერი და დიდი პოტენციალის მქონეა საფრანგეთის ნაკრები. ყველა რგოლში დაბალანსებული შემდგენლობით ფრანგები ახერხებენ იმას, რომ თუნდაც საქართველოს დარ ნაკრებს პერიოდი 30:9 მოუგონ. გამართული, მჭიდრო დაცვა და სწრაფი შეტევა, ამას დამატებული სროლათა მაღალი შედეგიანობა. ვინსენ კოლიეს გუნდი უნაკლოდ გამოიყურებოდა და დამსახურებულ გამარჯვებასაც მიაღწია.

ტონი პარკერი, ნიკოლას ბატუმი, ნანდო დე კოლო, ბორის დიაო და რუდი გობე - მოსკოვის ცეესკელი დე კოლოს გარდა ფრანგთა სასტარტო ხუთეულის ყველა წევრი ნბა-ში თამაშობს და თავის გუნდში უბრალო როლს კი არ ასრულებს, წამყვანი კალათბურთელია. ამათ შორის ყველაზე უცხო რუდი გობეა, რომელსაც მსოფლიო ჯერ იმიტომ არ იცობს, რომ ახალგაზრდაა და ნბა-ში, კერძოდ კი „იუტა ჯაზში“ სახელს ეხლა იხვეჭს. ერთი სიტყვით, საფრანგეთის ნაკრების მოთამაშეებზე საუბარი შორს წაგვიყვანს, საკითხავი ჩვენი ნაკრები და მის წევრთა სპორტული ფორმაა.

ძნელია ისაუბრო სპორტულ ფორმაზე, როცა ქართველ კალათბურთელებს მსოფლიო დონის ვარსკვალების წინააღმდეგ უწევთ თამაში. როცა შედარებით სუსტი მეტოქე ჰყავდათ, ქართველებმა მატჩის მოგება შესძლეს - შეგახსენებთ, რუანის ტურნირის პირველი მატჩი კოკოშკოვის გუნდმა საკმაოდ მძლავრ ბელგიას 70:68 მოუგო. რაც შეეხება ფრანგებთან მატჩს, რაც შეეძლოთ, ბიჭებმა გააკეთეს.

ქართველებმა მეტოქეზე 6-ით მეტი სამქულიანი ჩააგდეს და ამ კომპონენტში სროლათა პროცენტულობაც მასპინძლებზე უკეთესი ჰქონდათ, მაგრამ მხოლოდ შორი სროლები არაა საქმე. სამქულიანებსაც იმიტომ ესროდნენ ჩვენები უფრო ხშირად, რომ ფრანგების ქებული დაცვის გამო მეტოქის საჯარიმოში შესვლა უჭირდათ. რაც შეეხება სხვა კომპონენტებს, ფრანგებმა ყველა მათგანში იძალეს. და მაინც, ასეთი დიდი სხვაობა არ იქნებოდა, რომ არა საქართველოს ნაკრების მოთამაშეების ჯამურად დაკარგული 23 ბურთი. დიდი უპირატესობა ჰქონდათ ფრანგებს მოხსნებში (12-ით მეტი), თუმც მთავარი იარაღი, რითაც მასპინძლებმა იძალეს, ზუსტი ორქულიანები, სწრაფი გარღვევები და საშუალო სროლები იყო. საფრანგეთის ნაკრებმა 32 ორქულიანი ჩააგდო, ქართველებმა კი მხოლოდ - 8.

საფრანგეთის ნაკრებში 17 ქულით საუკეთესო იყო ნანდო დე კოლო, ხოლო შარლ კაუდის ანგარიშზე 13 ქულა დაგროვდა. სახელგანთქმულმა ტონი პარკერმა შეხვედრა 6 ქულით და 7 პასით დაასრულა. .

საქართველოს ნაკრებში 14 ქულითა და 5 პასით საუკეთესო შედეგი ჰქონდა გიორგი ცინცაძეს, რომელმაც 4 სამქულიანი მიითვალა, ხოლო 3 სამიანის ჩამგდებ მანუჩარ მარკოიშვილმა თავი 11 ქულას მოუყარა.

საქართველოს ეროვნულმა ნაკრებმა რუანის ტურნირი თითო მოგებ-წაგებით დაასრულა და 22 აგვისტოს საფრანგეთს დატოვებს. სწორედ ამ დღეს ითამაშებენ საფრანგეთი და ბელგია. იგორ კოკოშკოვის ნაკრები საფრანგეთიდან სლოვენიაში, დაბა პოდჩეტრტეკში მიემგზავრება, სადაც საწვრთნელ შეკრებას გააგრძელებს და 28-30 აგვისტოს კიდევ ერთ სერთაშორისო ტურნირში მიიღებს მონაწილეობას. იტალიის ქალაქ ტრიესტში მასპინძელი ქვეყნის ნაკრებთან ერთად თავს რუსეთი, საქართველო და ამერიკის სტუდენტური ლიგის მოწინავე გუნდი - „მიჩიგანის უნივერსიტეტი“ მოიყრიან.

ამხანაგური მატჩი. რუანი, საფრანგეთი. 21 აგვისტო
საფრანგეთი 95:53 საქართველო
22:15, 19:17, 30:9, 24:12

საქართველო: ცინცაძე (14ქ, 5პ), მარკოიშვილი (11), სანიკიძე (8), ბურჯანაძე, ფაჩულია (4); პულენი (5ქ, 4პ), ფხაკაძე, შერმადინი (4), სანაძე (5), ფაცაცია (2)

საფრანგეთი: პარკერი (6ქ, 7პ), დე კოლო (17), ბატუმი 14), დიაო (7), გობე (8);  ლუვერნი (6), დიაო (4), კაუდი (13), ფურნიე (9), პიეტრუსი, აჯინგა (8), ჟელაბალე (7),  ჯაიტი (2)